ސަރަހައްދީ މައި އޮޑިޓް އިންސްޓިޓިއުޝަންތަކާއި އެންޓިކޮރަޕްޝަން އިދާރާތަކަށް ޚާއްސަކޮށްގެން ތައިލެންޑުގައި މިއަދުފެށި މަސައްކަތު ބައްދަލުވުމެއްގައި ކޮމިޝަނުގެ މެންބަރު ޝަޒްނާ ޙާޝިމް ބައިވެރިވެވަޑައިގެންފިއެވެ.

"ރީޖަނަލް ވޯކްޝޮޕް އޮން އެންހޭންސިންގ ދަ ކޮލަބަރޭޝަން ބިޓްވީން ސުޕްރީމް އޮޑިޓް އިންސްޓީޓިއުޝަންސް އެންޑް އެންޓި-ކޮރަޕްޝަން ބޮޑީސް"ގެ ނަމުގައި ކުރިއަށް ގެންދާ މި މަސައްކަތު ބައްދަލުވުން ކުރިއަށްގެންދަނީ މިއަދުން ފެށިގެން 3 ދުވަހުގެ ނިޔަލަށް ތައިލެންޑުގެ ވެރިރަށް ބެންކޮކްގައެވެ.

ޔޫއެންއޯޑީސީން އިންތިޒާމްކޮށްގެން، މަޝްވަރާ ބައްދަލުވުންތަކެއް ހިމަނައިގެން ކުރިއަށްގެންދާ މި މަސައްކަތު ބައްދަލުވުމަކީ ސަރަހައްދީ އަދި ޤައުމީ ފެންވަރުގެ އޮޑިޓް އިންސްޓިޓިއުޝަންތަކާއި އެންޓި-ކޮރަޕްޝަން އިދާރާތަކުގެ މެދުގައި އެއްބާރުލުން ގާއިމްކޮށް ގުޅިގެން މަސައްކަތްކުރުމަށް ހިތްވަރުދިނުމެވެ.

ރާއްޖޭ ހިމެނޭހެން މި މަސައްކަތު ބައްދަލުވުމުގައި އޭޝިޔާގެ 24 ޤައުމެއްގެ އޮޑިޓް އިންސްޓިޓިއުޝަންތަކާއި އެންޓިކޮރަޕްޝަން އިދާރާތަކުން ބައިވެރިވެއެވެ.